Ēitita: Te Ao Mārama

Poipoia te kākano kia puāwai

He Whakaputanga kua ētita e Te Rātā Campbell

---

He uri tēnei nō Te Rarawa me Te Aupōuri. I tipu ake i te Tūranga-nui-a-Kiwa.

Tuituia ngā taura kahika

Tuituia ngā taura tangata

Tuituia ngā taura o Te Tumu Herenga Waka

Kei ngā karangaranga maha, kei ngā mana nui, kei ngā mauri tiketike o te motu, tēnā koutou. Ka paoro taku karanga pōwhiri mai i te maunga o Whakakoro ki Ahumairangi, nei he mokopuna o te Nōta e tuku reo matakuikui atu ki a koutou katoa. Kia puāwai ai te pā harakeke whānui, me rangaranga ngā tini rau o te motu e tātou, kia matomato ai. Kia matomato te reo Māori. Kia matomato te iwi Māori. Kia matomato te ao Māori. Kia matomato Te Tumu Herenga Waka

---

Kia ora! E hīkaka ana au i tō kōwhiri i tēnei pukapuka! Ko Te Rātā Campbell ahau, ko au te Āpiha Tūmatanui o Ngāi Tauira, te Rōpu Tauira Māori o Te Herenga Waka.

Nā tēnei, kua tau mai ki au te marenga nui o te turanga kaiētita manuhiri mō tētahi whakaputanga Salient mō te Wiki o te Reo Māori. He tino kuru pounamu tēnei whakaputanga, koia ko Te Ao Mārama. He mea kua tapa nā te orokohanga o tō tātou ao.

I te tuatahi ko te whakaaro, nā, ko te mauri, nā ko te āhua. Mai i tēnei ka hua ko te Kore, te Pō, ka puta ki te Wheiao, ki te Ao Mārama.

Ka hua mai tēnei kōrero i te whakataukī, “Poipoia te kākano kia puāwai.” Ko te huahuataunga o te whakapapa mai i te kore ki te ao mārama.

Mo te whakaputanga Salient o tēnei wiki, ko te ingoa “Te Ao Mārama” e tohu ana i te whakatairanga o ngā tauira Māori ki te Herenga Waka. E tohu ana i te hokianga mai o tō tātou reo, o ō tātou tikanga ki te wheiao, ki te ao mārama.

Te Ao Mārama, Poipoia te Kākano kia Puāwai. Ki tōku nei whakaaro, he tika rawa tēnei kaupapa mō te whakaputanga o tēnei tau i te mea e whai pānga ana ki a tātou katoa. Kua hua ngā mea katoa mai i tētahi kākano i ruia mai i Rangiatea. I ahu mai tātou katoa i te kākano i roto i te whare tangata, ō tātou whānau kua poipoia e ō tātou tūpuna nō ngā kākano o ō tātou māra, ō tātou tamariki nō te aroha kua tupu i rō ngākau.

Ka puāwai ō tātou tikanga, tō tātou reo ki roto i a tātou i a mātou e whakahiapo ana i a tātou anō mō tō tātou Māoritanga.

Ki a au nei, ko te Ao Mārama he hua e whāngai ana te hononga o mātou ngā tauira Māori ki te Ao Māori. He tohu whakatupu, he tohu hauora a te Ao Mārama mo ngā tauira Māori o Te Herenga Waka. He wāhi kia whakaputaina, kia whakaāhua ngā tauira Māori i a rātou anō, reo Pākeha mai, reo Māori mai. Nā tēnei, ka kitea te puāwaitanga o ngā tikanga, o te Reo. E toro mai ana tōku ringa ki a koutou ngā tauira Māori o te Herenga Waka - nau mai, haere mai ki tēnei Ao Mārama, hākoa te roa o tō noho.

Nei rā te mihi ki te hāpai ō mua, ō muri, nā koutou te kaupapa i tutuki. E mihi pau te kaha ana ki te rōpu Salient me te Komiti Whakahaere mō te hāpai, mo te aroha mutungakore. Ki a koutou, ngā kaituhi, ngā ringatoi, ngā kaiwhakamāori (inā te tautāwhi a Vini Olsen-Reeder), e kore te puna mihi e mimiti, e kore te aroha e maroke i te rā.

Ki a koutou, te hunga pānui, nei rā te mihi nui - tēnā koutou, tēnā koutou, tēnā koutou katoa. Nāu i hāpai te poipoitanga o te kākano, tēnā, kia puāwai tahi tātou katoa.

Slay,

Te Rātā