Mihi: He Poroporoaki
Tiwhatiwha te pō, tiwhatiwha te ao!
Whakaeke mai ko roimata, kō hūpē, i ngā mate o te wā nei.
Tenei te whakaiti i ngā parekawakawa o ngā mate kua whetūrangi ki te pō, ki ngā kanohi kua tae mai, kua wehe i to tātou whare wananga nei, kia tangihia e tātou ngā waihotanga o rātau mā. He rurutu roimata tā te manawa e. E tangi hotuhotu, e manawa e, te pātukiuki o te whatumanawa rongona nuitia ki ngā kokona o te ao. Kei te mōteatea ngā mahara, ko tāna hiahia kia rongo i tō ahua, i tō aroha.
Ka rewa a Pōhutukawa ki te pae. He tohu maumaharatanga o rātou kura ngaro ki te pō. He karanga tēnei ki a koe e te whetu, tīrama mai. Tīrama mai kia hura ngā mata o ngā tūpuna. Tākina te ara hei whai mā mātou. Whakara ake ano i a mahara mō te kāhui ākonga onamata, te kahui kaiako onamata, te whānau o Te Herenga Waka
Nau mai Koanga. Ka puāwai te kōwhai, ka tangi te Pipiwharauroa. Ko tēnei te wā kia whakarite i a tātau ano. Kia ea ngā mahi ō ngā wā e heke mai nei, me mihi kā tika. Me tuku mihi ki ngā rangatira, ngā māreikura o mātau kua whakatakoto i te ara hei hikoi mā mātou. He reo tēnei hei whakamana i a rātou kua poipoi i ngā kakano, kia puawai a tōna wā.
E moe, e okioki, tukuna mai te mana ki a mātau kua waiho nei ki te kawe i tō tātau whare ki anamata.
Ka huri,
